Asociacións de Lugo coñecerán a zona de marisqueo e a nave de escachado de ourizo de Lira
Asociacións de Ourense participarán o xoves na poxa da lonxa de o Grove, verán o traballo que realizan as redeiras e coñecerán unha depuradora da zona
Santiago, 3 de Novembro de 2009.-

O proxecto piloto Mar Achega continúa mañá en Lira
(Carnota) coa visita da Asociación de Consumidores Usuarios en Marcha de Lugo. Este
colectivo coñecerá a zona de marisqueo, a nave de escachado de ourizo e tamén asistirán á
poxa na lonxa de Lira. O obxectivo desta iniciativa é a valorización dos produtos do mar e a
potenciación do seu consumo.

O itinerario comezará coa visita á zona de marisqueo e posteriormente os membros da
asociación desprazaranse ata a lonxa para participar nunha degustación de produtos da
pesca artesanal. Continuarán o roteiro no porto, onde asistirán á poxa na lonxa de Lira para
coñecer o proceso de venda de peixe.

A seguinte visita de Mar Achega será o xoves 5 de novembro ao Grove. Participarán as
Asociacións Montealegre de Ourense, Acur de Ribadavia e Airiños de Terra de Verín.
Alí os visitantes coñecerán as zonas de marisqueo e o peirao do Grove, lugar no que
recibirán unha explicación sobre embarcacións e artes de pesca. Logo dun xantar baseado
en produtos da pesca artesanal, os visitantes participarán na poxa da lonxa, verán o traballo
que realizan as redeiras e coñecerán unha depuradora. Por último os visitantes acudirán á
peixería Baixura Galega pertencente á Confraría de Pescadores San Martiño do Grove.

O programa, organizado pola Consellería do Mar en colaboración co Instituto Galego de
Consumo, contempla un total de 10 visitas a 7 portos da comunidade nas que están a
participar 50 persoas en cada unha. En total, beneficiaranse do programa Mar achega 500
persoas pertencentes a asociacións de consumidores do interior de Galicia. As actividades
programadas variarán en función da localidade na que se desenvolvan, pero sempre inclúen
a asistencia a unha poxa, a visita a puntos de extracción e depuración así como a
degustacións de produtos á par que se difunde o patrimonio marítimo pesqueiro da zona de
destino.

Temática:
Outros