O Instituto Galego de Consumo ofrecerá mañá mércores, 14 de abril, unha nova xornada informativa en Ourense para achegar aos consumidores e usuarios a iniciativa Dálle luz á túa factura, unha iniciativa de divulgación, formación e sensibilización coa que a Consellería de Economía e Industria persegue facer máis compresible a factura da luz resolvendo as dúbidas da cidadanía e fomentando, ao mesmo tempo, o aforro enerxético.
O encontro, que conta coa colaboración da Agrupación Veciñal Miño, celebrarase a partir das 17 horas no local deste colectivo, situada na rúa Doutor Marañón, 6, e nel presentarase o simulador eléctrico, unha aplicación que permite aos usuarios obter información sobre cada un dos elementos que conforman a factura eléctrica, personalizala e adaptala ao seu caso concreto recomendando unha potencia a contratar. Esta ferramenta, dispoñible na web igc.xunta.es, desglosa, tamén, o consumo do fogar, determinando o equipamento eléctrico co que conta a vivenda e as posibilidades de optimizar o seu consumo.
Os asistentes poderán consultar as súas dúbidas a respecto da factura eléctrica e resolver diferentes casos prácticos, así como obter información sobre as distintas vías para darlle solución as súas reclamacións. Ademais, recibirán consellos sobre como reducir o consumo de enerxía no fogar.