O programa Lecer Consumo do IGC achegou este verán o ocio responsable a preto de 900 persoas

O programa Lecer Consumo do Instituto Galego de Consumo (IGC), dependente da Consellería de Economía e Industria, achegou este verán o consumo responsable a preto de 900 persoas nun total de 23 concellos galegos, a través de diferentes actividades lúdicas e participativas centradas nos xogos populares.

Entre as actividades desenvolvidas destacan o obradoiro de criterios de escolla de xoguetes, Xogamos en Igualdade, dirixido aos máis cativos, a Oca: o xogo do viaxeiro, destinada a amosar os criterios de seguridade á hora de viaxar para os máis maiores e unha xincana de Lecer e Publicidade, para rapaces de 9 a 16 anos.

Esta iniciativa permanece activa coa votación no facebook da Escola Galega de Consumo dos vídeos promocionais do consumo responsable no seu municipio previamente filmados polos rapaces. O vídeo que resulte en primeiro lugar coas votacións recibidas ata o vindeiro día 30 de setembro recibirá un agasallo.

Durante os meses de xullo, agosto e setembro, participaron no programa Lecer Consumo os concellos de San Sadurniño, Boqueixón, Pereiro de Aguiar, Santiago de Compostela, Bergondo, Mañón, Cerceda, Dodro, Vigo, Valga, Meis, A Estrada, Vilamartín de Valdeorras, Ribadumia, Vilarmaior, Pontecesures, Carnota, Oroso, Boiro e Miño, así como a Asociación Comercio do Carballiño, a Fundación Eduardo Pondal de Ponteceso e o Centro de Iniciativas Turísticas de Parga.