Os estudantes que participen en Consumópolis poderán optar a tres galardóns de 1000, 600 e 300 euros por cada categoría e os equipos gañadores representarán a Galicia na fase estatal do concurso
Para os mellores proxectos de Galicons-net concederanse catro premios de 1500 euros
Os docentes das iniciativas galardoadas recibirán un recoñecemento da Administración autonómica en horas de formación do profesorado
Santiago de Compostela, 26 de Febreiro de 2018.-

A Consellería de Economía, Emprego e Industria, a través do Instituto Galego do Consumo e da Competencia (IGCC), e a Consellería de Cultura, Educación e Ordenación Universitaria acaba de convocar hoxe as bases para participar nos concursos de Consumópolis e Galicons-Net cos que se busca fomentar o consumo responsable a través da innovación nos centros educativos de Galicia. O Diario Oficial de Galicia (DOG) publica hoxe as convocatorias dos premios.

Dunha banda, Consumópolis é un concurso escolar sobre consumo responsable e calidade de vida, que conta cunha grande traxectoria en Galicia e que este ano acada a súa 13ª edición. Consumópolis-13, Na publicidade: ¿Todo vale? céntrase na publicidade dos bens e os servizos dirixida á infancia e á adolescencia. O certame consta de dúas fases: na primeira, os equipos participantes, formados por cinco alumnos a alumnas, teñen que superar distintas probas na plataforma virtual de Consumópolis; na segunda fase os equipos terán que realizar un cartel publicitario e un lema ou slogan. Deste xeito, preténdese que o alumnado reflexione sobre o que está permitido e non permitido na publicidade e tome conciencia daquelas técnicas publicitarias constitutivas de publicidade ilícita.

Nesta iniciativa establécense tres categorías: a primeira para o alumnado de 5º e 6º curso de educación primaria; a segunda para estudantes de 1º e 2º curso de educación secundaria obrigatoria; e a terceira dirixida ao 3º e 4º curso de educación secundaria obrigatoria.

Concederanse tres premios de 1000, 600 e 300 euros para os traballos clasificados respectivamente en primeiro, segundo e terceiro lugar por cada unha das categorías. Os traballos clasificados en primeiro lugar en cada unha das categorías de participación representarán a Comunidade Autónoma de Galicia na fase estatal, que terá lugar en Madrid. Os centros terán ata o día 27 de abril para realizar os traballos e presentar a súa solicitude de participación.

O pasado ano inscribíronse neste concurso 19 centros educativos de toda Galicia, cun total de 685 alumnos e alumnas participantes divididos en 137 equipos.

Pola súa banda, os participantes en Galicons-net teñen que realizar un proxecto de innovación educativa sobre algunha das seguintes temáticas de consumo responsable: consumo e xénero, linguaxe publicitaria, comercio electrónico ou servizos financeiros. Neste certame participaron este curso máis de 900 alumnos e alumnas de 15 centros.

Na convocatoria dos premios para este ano establécense catro categorías de participación: para o alumnado de segundo ciclo de educación infantil e de educación primaria; estudantes de educación secundaria obrigatoria; bacharelato, de ciclos formativos de grao medio e de grao superior e formación profesional e de educación de persoas adultas; e a cuarta categoría- que se incorpora neste curso escolar- vai dirixida ao alumnado de educación especial.

O mellor proxecto en cada unha das modalidades recibirá un premio en metálico de 1500 euros. Neste caso, os centros participantes poderán presentar os seus traballos ata o día 2 de xullo de 2018. Ademais, o profesorado participante nos proxectos premiados recibirá por parte da Consellería de Cultura, Educación e Ordenación Universitaria unha certificación de innovación educativa en horas de formación do profesorado.

Os centros poderán presentar as súas solicitudes a través do formulario dispoñible na sede electrónica da Xunta de Galicia, https://sede.xunta.gal.

Temática:
Outros