 A directora xeral de Comercio, Sol Vázquez, e a xerente do Instituto Galego de Consumo, María Jesús Muñoz, mantiveron un encontro cunha vintena de pasaxeiros galegos
 O Instituto pon á disposición de todos os afectados a opción de centralizar desde Consumo as reclamacións que presenten a Ryanair
 O organismo autonómico vai ofrecer mediación á compañía, e se esta non satisfai as demandas dos consumidores trasladaranse as reclamacións á Agencia Estatal de Seguridad Aérea, que é a competente nesta materia
 Os pasaxeiros afectados poden informarse nas oficinas do IGC nas sete principais cidades galegas e no teléfono gratuíto 900 23 11 23
Santiago de Compostela, 3 de Novembro de 2016.-

A directora xeral de Comercio, Sol Vázquez Abeal, e a xerente do Instituto Galego de Consumo, María Jesús Muñoz, mantiveron hoxe un encontro cunha vintena de afectados do voo cancelado a semana pasada entre Lanzarote e Santiago de Compostela, no que lles achegaron información e asesoramento e lles ofreceron a posibilidade de centralizar a través do IGC as reclamacións que os pasaxeiros presenten á compañía.

 

Tal e como informaron as responsables do IGC, o organismo autonómico vai ofrecer a vía da mediación a Ryanair para intentar chegar unha resolución ao conflito cos usuarios. Se a empresa non satisfai as demandas dos pasaxeiros desde Consumo daráselle traslado das reclamacións á Agencia Estatal de Seguridad Aérea, competente nesta materia.

 

Todos os afectados poden informarse nas oficinas do Instituto Galego de Consumo nas sete principais cidades galegas, así como no teléfono gratuíto 900 23 11 23. Así mesmo, na web do IGC (consumo.xunta.gal) achégase información e documentación sobre diferentes aspectos dos dereitos dos usuarios do transporte aéreo.

 

 

GABINETE DE COMUNICACIÓN DA CONSELLERÍA DE ECONOMÍA, EMPREGO E INDUSTRIA

Temática:
Transporte e motor›Avións