O director xeral de Comercio e Consumo, Manuel Heredia, acompañou esta mañá a estudantes de 6º de primaria do centro educativo compostelán Casa do Neno que hoxe coñeceron a actividade do Instituto Galego do Consumo e da Competencia (IGCC) dentro das actividades programadas con motivo da Semana da Administración Aberta.
Ao longo da visita, o alumnado coñeceu en persoa o traballo do Instituto, e como ser persoas consumidoras máis conscientes, responsables e críticas. Mediante dúas actividades lúdico didácticas comprobaron que artigos ou produtos que se poden atopar cada día no mercado poden ser inseguros, e fixeron unha pequena compra no supermercado co que conta a Escola Galega de Consumo para este tipo de iniciativas formativas. Ademais, coñeceron os pasos a seguir no caso de ter que facer valer os seus dereitos como persoas consumidoras.
Por outra banda, esta mesma semana o Laboratorio de Consumo de Galicia, situado na Coruña, recibiu nas súas instalacións aos alumnos de STEM Bach da Compañía de María da cidade, que puideron coñecer de preto o traballo que desenvolven os diferentes departamentos do laboratorio.
O Laboratorio de Consumo de Galicia, que recibiu en dúas ocasións o premio aos funcionarios innovadores da Xunta de Galicia, supón un contacto real para os estudantes con inquedanzas científicas que ven como se aplican á seguridade e á calidade dos produtos de consumo as metodoloxías que rexen o traballo tecnolóxico. Unha mostra da innovación realizada no Laboratorio de Consumo e que puideron comprobar in situ é a utilización da tecnoloxía 3D que se empregan para fabricar pezas que permiten ampliar as análises dispoñibles.